Həkim bildirib ki, dünyada koronavirusa qarşı mübarizə davam edir. Bəzi ölkələrdə yoluxmaların sayı artdıqca, karantin qaydaları kəskin sərtləşdirilir. Azərbaycanda isə yoluxmaların sayı azaldığına, sağalanların sayı yoluxanların sayını üstələdiyinə görə karantin rejimi bir qədər yumşaldılıb. Bir sıra ticarət və iaşə obyektləri işə başlayıb. Yanvarın 18-dən isə ölkəmizdə vaksinasiya prosesinə başlanılıb:

 

"Məlum olduğu kimi, Azərbaycanda COVID-19-a qarşı Çinin "Sinovac" peyvəndi vurulur. Bu, inaktiv peyvənddir, yəni kimyəvi yolla tam zərərsizləşdirilmiş virusların antigenlərindən ibarətdir. İnsan bədəninə heç bir zərər verməyən peyvənd vasitəsilə orqanizm virusun təhlükəli, aktiv formasına qarşı immunitet qazanmış olur. Peyvənd vurulan insanlarda koronavirusa qarşı yaranan immunitet onları uzun müddət bu xəstəlikdən qoruya bilir".