O, bildirib ki, yanvarın 18-dən başlayaraq, ölkəmizdə vaksinasiya prosesi həyata keçirilir. Peyvəndləmədən sonra insanlar yenə karantin qaydalarına ciddi riayət etməlidir. Çünki, peyvəndləmədən dərhal sonra yoluxmaların qarşısı alınmır, buna bir qədər vaxt lazım gəlir və ikinci dəfə peyvəndlənmək mütləqdir. Karantin qaydalarına ciddi riayət olunmazsa, yoluxmaların sayı yenidən arta bilər, ona görə də, insanlar arxayınlaşmamalı, gigiyenik qaydalara riayət etməlidirlər.

 

Onun sözlərinə görə, pasiyent peyvənddən öncə mütləq müayinədən keçməli, sağlam olmalı və peyvənd vurulandan sonra yarım saat ərzində həkim nəzarətində olmalıdır. Sahə həkimləri peyvənd vurulan insanlar haqqında məlumat toplamalıdırlar. 

 

Həmçinin bildirib ki, insanlar psixoloji cəhətdən vaksinasiyaya hazır olmalı və peyvəndlərin mənfi təsirləri barədə düşünməməlidir. Mütləq deyil ki, peyvənddən sonra insanda hər hansı bir reaksiya yaransın, yaxud dəyişiklik olsun. Lakin müəyyən dəyişikliklərin olması da istisna deyil. Hər bir orqanizm peyvəndə fərqli reakisya verə bilər.

 

Həkim hələ ki, peyvəndlərin uşaqlar üzərində sınaqdan keçirilmədiyini və tam araşdırılmadığını da diqqətə çatdırıb. Qeyd edib ki, 12 yaşdan yuxarı uşaqlara peyvənd vurula bilər. Bəzi peyvəndlər isə 16 yaşdan yuxarı tətbiq edilməlidir.