Türkiyənin Səhiyyə Nazirliyi COVID-19 peyvəndinin yan təsirləri ilə qarşılaşdıqda nələrin edilməli olduğu ilə bağlı məlumat paylaşıb.

Aztibb.az Medimagazin.com.tr-yə istinadən xəbər verir ki, məlumatda bildirilib: "Vaksin vurulandan sonra şişkinlik, ağrı, qızartı aşkarlanarsa qol yüksəklikdə saxlanılaraq soyuq kompres tətbiq edilməlidir. Buzun dəriyə birbaşa təması qəti qadağandır. Dəsmalın isladılaraq peyvənd yerinə qoyulması məsləhətdir. Bundan əlavə, qeyd olunan vəziyyətdə tərkibində parasetamol olan ağrıkəsicilərindən istifadə edilə bilər".

"Simptomlara əsasən tətbiq edilməli olan prosedur belə sıralanır:

Yorğunluq müşahidə edilərsə, istirahət edin, kifayət qədər maye qəbul etdiyinizdən əmin olun.

Baş ağrısı, əzələ, oynaq ağrısı, yüngül qızdırma, üşütmə halında kifayət qədər maye qəbulu və istirahətlə yanaşı, tərkibində parasetamol olan ağrıkəsicilərdən istifadə edə bilərsiniz.

Qusma, ishal halında isə bol miqdarda maye ilə yanaşı ishal halına uyğun olaraq pəhrizinizi tənzimləyin.

Qusma halının intensivləşdiyi və maye, qida qəbul edə bilmədiyiniz halda isə mütləq yaxınlıqda olan sağlamlıq müəssisəsinə müraciət edin",-  deyə məlumatda qeyd edilib.

Nazirlik vətəndaşlara müraciət edərək, COVID-19 peyvəndinin tətbiqindən sonra, peyvəndlə əlaqəli olduğu düşünülən hər hansı narahatlıq halında ən yaxın səhiyyə müəssisəsinə müraciət etmələrini bildirib.