Yeni növ koronavirusun (COVID-19) ortaya çıxdığı Çinin Vuhan şəhərində 4 xəstədən 3-nün virusa yoluxduqdan 6 ay sonra ən azı bir sağlamlıq problemi ilə qarşılaşdığı aşkar edilib.

Aztibb.az medimagazin.com.tr-yə istinadən xəbər verir ki, Çinli elm adamları yanvar və may aylarında Vuhan'da COVID-19 aşkarlanan 1700 xəstəni altı ay ərzində izləyərək araşdırma aparıblar.

Tədqiqatın nəticələri 8 yanvarda "The Lancet" jurnalında yayımlanıb.

Tədqiqatçılar COVID-19-a qalib gələn xəstələrin 76 faizinin 6 aydan sonra ən azı bir sağlamlıq problemi yaşadığını müəyyən edib.

Araşdırmada altı aydan sonra bu insanların 63 faizinin əzələlərində yorğunluq və ya zəiflik, 26 faizində yuxu problemi və 23 faizində depressiya olduğu bildirilib.

Mütəxəssislər COVID-19-dan sağalanların ciddi ağciyər funksiyası pozğunluğu və böyrək funksiyalarında 13 faiz azalma yaşadıqlarına da diqqət çəkdilər.

Pekinin Çin-Yaponiya Dostluq Xəstəxanası və Paytaxt Tibb Universitetinin Milli Tənəffüs Tibbi Mərkəzinin tədqiqatçısı dr. Bin Cao qeyd edib ki, COVID-19 çox yeni xəstəlik olduğundan onun uzunmüddətli təsirlərini yeni anlamağa başlayırıq.

B. Cao xəstəliyi ağır keçirmiş pasiyentlərin xəstəxanadan buraxıldıqdan sonra baxıma ehtiyacı olduğunu da vurğulayıb.