COVID-19-a yoluxmuş Azərbaycan Tibb Universitetinin (ATU) Onkoloji Klinikasının onkoloqu, Onkologiya kafedrasının dosenti, tibb üzrə fəlsəfə doktoru Nəsimi Qasımov sağalaraq evə yola salınıb.

Aztibb.az xəbər verir ki, koronavirusa qalib gələn Nəsimi Qasımov virusla mübarizə apardığı günlərdə yaşadıqlarından danışıb.

Onkoloq bildirib ki, hərarəti yüksək olub və COVID-19 testi pozitiv çıxdıqda o, ATU-nun Tədris-Terapevtik Klinikasına yerləşdirilib:

"Dekabr ayının 22-də klinikaya yerləşdirildim. Çəkimin çox, yaşımın 70 olması və bunlarla yanaşı, hipertoniya xəstəliyimin olması səbəbilə vəziyyətimin daha da ağırlaşmaması üçün klinika şəraitində müalicə olunmağım məsləhət görüldü. Klinikada müalicə aldığım şöbədə həkimimiz həmin şöbənin müdiri Günel Sadıqova idi. Burada olduğum müddətdə dəfələrlə ATU-nun rektoru, prof. Gəray Gəraybəylinin, Onkoloji klinikanın direktoru, akademik Əhliman Əmiraslanovun, ATU-nun Tədris Terapevtik Klinikasının direktoru, prof. Surxay Musayevin, klinikanın baş həkimi Fəridə Hacıyevanın qayğısını hiss etdim".

Nəsimi Qasımov əlavə edib ki, bu klinikanın zamanında tikilib istifadəyə verilməsi səhiyyənin inkişafı istiqamətində dövlətimiz tərəfindən aparılan uğurlu siyasətin nəticəsidir. Klinika bütün müasir standartlara cavab verir və burada xəstələrin müayinə və müalicələri üçün hər cür şərait var: "Artıq özümü əvvəlki kimi yaxşı hiss edirəm və klinikadan evə buraxılıram. Göstərdikləri qayğıya görə yorulmadan gecə-gündüz çalışan başda klinikanın rəhbərliyi olmaqla, bütün tibb personalına dərin təşəkkürümü bildirirəm".