Misirdə COVID-19-a yoluxanların sayı artıb. Bunu ölkənin səhiyyə naziri Halə Zayid yeni növ koronavirus pandemiyasının ikinci dalğasının başladığını bəyan edib.

Misir Səhiyyə Nazirliyinin məlumatına görə, son sutka ərzində ölkədə 1400 nəfər COVID-19-a yoluxub, 61 pasiyent isə həyatını itirib. Yoluxanların ümumi sayı 134 min nəfərə çatıb, 7466 pasiyent ölüb. Misir COVID-19-dan ölüm hallarına görə Afrika qitəsində ikinci, ərəb ölkələri arasında isə birinci yerdədir.

Səhiyyə Nazirliyi ölkəyə Çin istehsalı olan vaksinin ilk partiyasının gətirildiyi barədə məlumat yaysa da, kütləvi vaksinləmə prosesinin yaxın günlərdə başlayacağı gözlənilmir. Misirin Nazirlər Kabineti pandemiyanın daha çox yayılmasının qarşısını almaq məqsədilə Yeni il şənliklərinin keçirilməsini qadağan edib. Bundan başqa, ictimai nəqliyyatda və qapalı məkanlarda qoruyucu maskalardan istifadəyə nəzarət gücləndirilib, hospitallarda yenidən tibb personalının səfərbərliyi elan olunub.