Yeni növ koronavirusdan (COVID-19) sağalmış insanlarda virusa qarşı qazandıqları immunitetin 8 ay davam edəcəyi müəyyən edilib.

COVID-19 xəstələrinin bu virusa qarşı nə qədər uzun müddət immunitetli olduqlarına dair araşdırma Avstraliyalı alimlər tərəfindən "Science Immunology" jurnalında dərc edilib.

Aztibb.az medimagazin.com.tr-yə istinadla xəbər verir ki, Monash Universiteti, Alfred Xəstəxanası və Burnet İnstitutu tərəfindən aparılan araşdırmada COVID-19 diaqnozu qoyulmuş 25 xəstədən və virusa yoluxmayan 36 nəfərdən alınan qan nümunələri analiz edilib.

COVID-19 xəstələrinin qan nümunələrində anticisimlərin simptomlar görünməyə başladıqdan 20 gün sonra təsirini itirdiyi müşahidə edilib.

Araşdırmada, həmçinin müəyyən edilib ki, anticisimlər yox olsa belə, yaddaş B hüceyrələri qalır və bu hüceyrələr 8 ay ərzində COVID-19-a qarşı toxunulmazlıq təmin edir.

Monash Universitetindən olan immunoloq Menno Van Zelm peyvəndin yaratdığı toxunulmazlığın nə qədər davam edəcəyinin sual altında olduğu və apardıqları araşdırmaların peyvəndin uzun müddət qorunmanı təmin etməsinə böyük ümid vəd etdiyini bildirib.