Dekabrın 26-da Avstriyada koronavirus pandemiyası başlayandan bəri sayca üçüncü sərt karantin rejimi qüvvəyə minib.

Xarici KİV-lərin məlumatına görə, dekabrın 7-də karantin qaydaları Milad bayramı ilə əlaqədar yumşaldılmış, ticarət obyektlərinin fəaliyyəti bərpa olunmuş və yaxın ailə üzvlərinin iştirakı ilə Milad bayramının qeyd edilməsinə icazə verilmişdi. Artıq bayram günləri başa çatdığına görə, ölkədə sərtləşdirilmiş karantin qaydaları üç həftə müddətinə yenidən qüvvəyə minib. Yanvarın 18-dək qüvvədə olacaq qaydalara əsasən, ölkədəki bütün ticarət və ictimai-iaşə obyektləri qapalı olacaq, məktəblərdə tədris distant qaydada aparılacaq. Mədəni-kütləvi, idman və əyləncə mərkəzlərinin bağlı olduğu dövr ərzində yalnız dağ-xizək idmanı mərkəzlərinin fəaliyyətinə icazə veriləcək.

Yanvarın 15-də Avstriyada keçiriləcək kütləvi testlərdə könüllü şəkildə iştirak edən və mənfi test nəticəsi alanlar üçün karantin rejimi yanvarın 18-də başa çatacaq. Bu testlərdə iştirak etmək istəməyənlər isə yanvarın 25-dək yalnız peşə fəaliyyəti, gündəlik tələbat mallarının alınması, köməyə ehtiyacı olan insanlara yardım və fiziki bədən tərbiyəsi məqsədilə ilə evlərini tərk edə biləcəklər.

Hazırda Avstriyada koronavirusa gündəlik yoluxma hallarının sayı 1500-2000 arasında dəyişir. Lakin ekspertlərin rəyinə görə, dekabrın 7-dən 26-na kimi karantin qaydalarının yumşaldılmasının nəticəsi olaraq yaxın günlərdə yoluxma hallarının kəskin artımı müşahidə oluna bilər və buna görə də Yeni il bayramında ”1+1” düsturuna (bir ailədən yalnız bir nəfər başqa bir ailəyə qonaq gedə bilər) riayət olunmalıdır.