Həkim reanimatoloq Şahin Məmmədov sosial şəbəkədə reanimasiyada olan koronavirus xəstələrinin müalicəsi ilə bağlı vacib məqamlara toxunub.

Həkim bildirib ki, əgər hər hansı bir COVID-19 xəstəsini itirmək istəmiriksə, onların müalicə olunduğu reanimasiya şöbələrində 3 ən vacib məsələyə diqqət yetirmək lazımdır.

Bunlara riayət edilmirsə, xəstə yalnız təsadüf nəticəsində xəstəxanadan sağ çıxa bilər.

1. Bir həkim maksimum 5 xəstəyə baxa bilir. Lakin 5-dən artıq xəstəyə bir həkim nəzarət edərsə, keyfiyyətdən söhbət belə gedə bilməz. Hazırda bəzi tibb müəssisələrində 1 həkimə 10-dan çox xəstə düşür. Bu, müalicə sayılmır.
2. Hər reanimasion xəstəyə reanimasiya işini yüksək səviyyədə bilən bir tibb bacısı lazımdır. Tibb bacısı həkimdən daha vacibdir. Xəstə ağırdısa, bir xəstəyə iki tibb bacısı baxmalıdır. Əgər 30 xəstəyə cəmi 3-4 tibb bacısı baxırsa, xəstənin oradan sağ-salamat çıxması böyük sual altındadır. Çünkü xəstəxanadaxili infeksiyanın yayılma ehtimalı böyükdür.
3. Həkim COVID xəstəsi ilə maksimum 6 saat keyfiyyətli şəkildə işləyə bilər. Əslində, 4 saatdan artıq işləyəndə artıq həkimin immuniteti də düşür, beyin normal fəaliyyət göstərmir.

"Gün ərzində 4 növbənin təşkili məqsədəuyğundur. Həkimlərdən biri, adətən gündüz gələn həkim xəstəyə görə məsuliyyət daşıyan həkim olmalıdır. Xəstənin cavabdeh həkimi olmazsa, hər həkim gəlib sadəcə öz saatının bitməsini gözləyəcək", - deyə o, əlavə edib.