"COVID-19-un mutasiyaya uğrayaraq yeni növünün yaranması təzə xəbərdir və hələ ki onun hansı problemlərə səbəb olacağı barədə dəqiq məlumat yoxdur, bunu zaman göstərəcək".

Bunu "Report"a açıqlamasında “Tibbi Ərazi Bölmələrini İdarəetmə Birliyi”nin (TƏBİB) tabeliyindəki Elmi-Tədqiqat Tibbi Profilaktika İnstitutunun direktoru, professor Adil Allahverdiyev bildirib.

Onun sözlərinə görə, mutasiyaya uğramış yeni növ virus Azərbaycanda da aşkar edilərsə, onun diaqnostikası COVID-19-dakı kimi aparılacaq: "Eyni metod tətbiq ediləcək. Sadəcə, ola bilər xəstəlik sürətli şəkildə yayılsın. Bu zaman düşünə bilərik ki, mutasiyaya uğramış virus Azərbaycanda var, ya yox. Ancaq bunun dəqiqləşməsi üçün xəstələrdən götürülmüş virusların molekulyar geni araşdırılmalıdır. Bu virus yeni deyil, eynidir, sadəcə, mutasiya baş verib. Yəni virusun genində dəyişiklik olub”.

A.Allahverdiyev indiyə qədər COVID-19-da 4 mindən çox mutasiya baş verdiyini deyib: “Amma bunların içində son baş verən mutasiya daha çox əhəmiyyət kəsb edir. Çünki mutasiya virusun yayılma sürətini artırıb. Amma bunu çox böyütmək də lazım deyil”.