Sərtləşdirilmiş xüsusi karantin rejiminin tətbiq olunduğu Şəki rayonunda koronavirus infeksiyasının yayılma sürətinin azaldılması və qarşısının alınması üçün nəzarət tədbirləri daha da gücləndirilib.
Şəhər icra hakimiyyətindən bildirilib ki, əhali arasında maarifləndirmə işlərinin aparılması məqsədilə yaradılmış 49 mobil qrup tərəfindən şəhərin ayrı-ayrı yaşayış məhəllələrində, həmçinin rayonun qəsəbə və kəndlərində izahetmə-xəbərdarlıq işləri davam etdirilir, fəaliyyətinə icazə verilmiş ticarət və digər obyektlərdə mütəmadi olaraq reydlər keçirilir. Reydlər zamanı vətəndaşlara gigiyena qaydalarına riayət edilməsinin, sosial məsafənin saxlanılmasının vacibliyi, tibbi maskalardan istifadə edilməsinin məcburiliyi izah olunur, tövsiyələr verilir.
Eyni zamanda, xüsusi karantin rejimi qaydalarını pozan obyektlərin sahibləri, həmçinin vətəndaşlar barəsində qanunvericilikdə nəzərdə tutulmuş qaydada inzibati tədbirlər görülür.
