Dekabrın 14-də ABŞ-da koronavirus əleyhinə kütləvi vaksinasiya kampaniyası başlayıb.

Aztibb.az Amerika KİV-lərinə istinadla xəbər verir ki, həkimlər vaksinasiyada ABŞ-ın Qida Məhsullarının və Tibbi Preparatların Keyfiyyətinə Sanitar Nəzarəti İdarəsinin təsdiq etdiyi “Pfizer” və “BioNTech” kompaniyalarının birgə hazırladıqları peyvənddən istifadə edirlər. Klinik sınaqlar xaricində ilk vaksinasiya edilən şəxs Nyu-York ştatının tibb işçisi olub.

ABŞ-da preparatın paylanmasına məsul olan general Qustav Perna bütün ölkə ərazisində xüsusi avadanlıqlarla təchiz olunmuş mərkəzlərə 3 milyon vaksin dozası çatdırılacağını bildirib. Bu ərəfədə “Pfizer” kompaniyasının Miçiqan ştatının Kalamazu şəhərində yerləşən istehsalat obyektindən ölkənin müxtəlif bölgələrinə vaksinlə dolu yük maşınları göndərilib.

Prezident Donald Tramp “Twitter” sosial şəbəkəsində yerləşdirilən videomüraciətində ABŞ-da klinik sınaqlardan kənar ilk vaksinasiyanın yaxın zamanlarda baş tutacağını bildirmişdi. Onun sözlərinə görə, hər bir ştatda, ilk növbədə, kimin vaksinasiya olunacağı barədə qərarı qubernatorlar verəcək.

ABŞ Böyük Britaniya və Kanadadan sonra “Pfizer” və “BioNTech” kompaniyalarının birgə hazırladıqları preparatın kütləvi vaksinasiyasına icazə verən üçüncü ölkə olub. Həmin peyvəndin klinik sınaqların üçüncü – final mərhələsində 95 faizlik effektivlik göstərdiyi bildirilir.

“Pfizer” ilk etapda ABŞ-a 6.4 milyon vaksin dozası çatdıracaq. Peyvənd 21 gün ara ilə vurulacaq iki dozadan ibarətdir.