Türk alimi prof. dr. Uğur Şahinin qurucu tərəfdaşı olduğu alman biotexnologiya şirkəti "BioNTech" tərəfindən ABŞ-ın "Pfizer" dərman şirkəti ilə birlikdə hazırlanan yeni növ koronavirus (COVID-19) peyvəndi İngiltərədə ötən çərşənbə axşamı tətbiq olunmağa başlayıb.

Aztibb.az medimagazin.com.tr-yə istinadla xəbər verir ki, İngiltərənin Peyvənd Əməliyyat Qrupunun rəhbəri Kate Bingham Pfizer/BioNTech, Oksford və "Moderna" peyvəndlərinin fərqli birləşmələrini sınaqdan keçirməyi planlaşdırdıqlarını açıqlayıb.

K.Bingham peyvəndlərin bəzilərinin güclü anticisim reaksiyası yaratdığını, digərlərinin isə T hüceyrə immunitetinə səbəb olduğunu bildirib və insanların hər iki immunitetə sahib olmasının vacibliyini qeyd edib.

Əməliyyat Qrupunun rəhbəri bu peyvəndlərin qarışdırılması metodunun sınaqlarına gələn il başlayacaqlarını açıqlayıb. O, peyvəndləri əhatə edən klinik sınaqların iki ay davam edəcəyini və yalnız təhlükəsiz və təsirli olduğu sübut edilmiş peyvəndlərin könüllülərə tətbiq ediləcəyini vurğulayıb.