Bu barədə həkim-reanimatoloq Şahin Məmmədov sosial şəbəkədə yüngül koronavirus xəstələrinin müalicəsi ilə bağlı paylaşımında məlumat verib.

 

Diaqnozun burun-udlaqdan götürülmüş yaxmada PCR vasitəsilə qoyulduğunu deyən həkim qan analizləri ilə COVID-19 diaqnostikasının artıq məsləhət görülmədiyini söyləyib.

 

Qeyd edib ki, müalicə yalnız simptomatikdir:

 

"Əzələ, baş ağrıları və ya qızdırmaya görə parasetamol yaxud ibuprofen içmək mümkündür. Yaxşı qidalanma, bol maye içmək lazımdır. Vitaminlər qəbul edə bilərsiniz. Polivitamin kompleksi isə gündə 1-2 tablet yolveriləndir".

 

Həkim insanları xüsusilə deksametazon, müxtəlif sistemlər, immun modulyatorlar, antivirus, antibiotik və antikoaqulyantlardan özbaşına istifadə etməməyə çağırıb. 

 

Diqqətə çatdırıb ki, xəstə izolyasiya olunduqdan 10 gün sonra əgər temperatursalıcı dərmanların təsir müddəti keçibsə və 24 saat ərzində temperatur 37.5 dən azdırsa, eyni zamanda xəstəliyin əlamətləri azalıbsa, şəxs sağalmış hesab olunur. Əlavə 3 gün ərzində nəzarət olunur, temperatur olmadığı təqdirdə, izolyasiyaya da artıq ehtiyac yoxdur.

 

O, yüngül xəstələrin ağırlaşma ehtimalının da olduğunu bildirib. Vurğulayıb ki, bu ağırlaşmanın qarşısını alacaq dərman yoxdur, profilaktik antibiotik yazmaq isə məsləhət deyil. Əgər ağırlaşma olarsa, orta ağırlıqlı ya ağır COVID xəstəsinin müalicəsinə başlanıla bilər.