Azərbaycan Texniki Universitetinin (AzTU) Elektronika kafedrasının müdiri, professor Hüseyn Orucov koronavirusdan vəfat edib.

AzTU-dan verilən məlumata görə, H.Orucov 1970-ci ildə Azərbaycan Dövlət Universitetinin (indiki Bakı Dövlət Universiteti) Fizika fakültəsini bitirib. O, 1990-cı ildən AzTU-nun Fizika kafedrasında baş müəllim, 1995-ci ildən dosent, 2009-cu ildən professor kimi elmi-pedaqoji fəaliyyətlə məşğul olub. 2010-cu ildə universitetin Elektronika kafedrasına müdir təyin edilib.

Professor H.Orucov 120-dən artıq elmi əsərin, ali məktəb tələbələri üçün 2 dərsliyin, eləcə də 4 dərs və metodiki vəsaitin, abituriyentlər üçün 1 test kitabının müəllifidir.

Azərbaycan təhsilinin inkişafındakı xidmətlərinə görə o, 2011-ci ildə Azərbaycan Respublikası Prezidentinin Sərəncamı ilə “Əməkdar müəllim” fəxri adına layiq görülüb.