Vyetnam dekabrın 10-dan etibarən koronavirus əleyhinə öz peyvəndinin könüllülər üzərində sınaqlarının ilk fazasına başlayacaq.

Aztibb.az Vyetnam hökumətinin internet-portalına istinadla xəbər verir ki, hazırda ölkədə fəaliyyət göstərən üç vaksin istehsalçısı intensiv şəkildə koronavirus əleyhinə preparatın hazırlanması ilə məşğuldur. Onların hamısı bu yaxınlarda heyvanlar üzərində sınaq mərhələsini başa çatdırıb. “Nanogen” əczaçılıq şirkətinin preparatı isə insanlar üzərində sınağa hazır vəziyyətə gətirilib.

“Nanogen” şirkəti dekabrın 10-da Vyetnam Hərbi Tibb Universiteti ilə birgə könüllülər üzərində sınaqların ilk mərhələsinə başlayacaq”, - deyə ölkənin səhiyyə naziri Nquen Than Lonq bildirib.

Qeyd edək ki, pandemiyanın statistikasını aparan "Worldometer" saytının son məlumatına əsasən, pandemiyanın əvvəlindən bu yana Vyetnamda koronavirusa yoluxanların sayı 1367 nəfər, infeksiya səbəbindən ölənlərin sayı isə 35 nəfərdir.