Türkiyədə yeni növ koronavirus (COVID-19) infeksiyasına yoluxan xəstələr və onlarla yaxın ünsiyyətdə olan şəxslərin karantin müddətinin 14 gündən az vaxta endirilməsilə bağlı qərar verilib.

Türkiyə Səhiyyə Nazirliyinin verdiyi xəbərə görə, qərarda bildirilib ki, COVID-19 test nəticələri pozitiv olan, özünütəcrid şəraitində evdə müalicəsi tövsiyə edilən xəstələrin karantin müddəti səhhətlərində hər hansı bir xəstəlik əlaməti olmadığı halda 10 gün müddətinə başa çatır. Bu şəxslərin COVID-19-la mübarizə tədbirləri şərtlərinə düzgün əməl etməklə aktiv sosial həyata qatılmaları məqbuldur.

Bundan başqa, COVID-19 infeksiyasına yoluxan xəstə ilə yaxın ünsiyyətdə olan və simptomları olmayan şəxslər üçün karantin müddəti 8 gün olub. Həmin şəxslər təcridin 5-ci günündə testdən keçməlidirlər. Nəticə neqativ çıxarsa, təcridin 8-ci günündə normal həyata qayıda bilərlər.

Qərarda o da qeyd olunub ki, karantin müddətinin azaldılması Qocalar evlərində, islah əmək müəssisələrində çalışanlara, zəif müqavimətli, xroniki xəstəlikləri və digər riskli xəstəlikləri olanlara şamil olunmur.