Tanınmış teleaparıcı Hacı Nuran Hüseynov koronavirusa yoluxub.

Aztibb.az xəbər verir ki, bu barədə onun özü məlumat verib:

"Nə qədər qorunmağa cəhd etsəm də, nə qədər qaçmağa çalışsam da, əsrin bəlası mənə də bulaşdı. Əslində, mən bir bəla ilə vuruşmuşam və qalib də gəlmişəm. Amma bildiyiniz kimi, mən risk qrupuna aidəm və mənə koronavirusa yoluxmaq qəti yolverilməz idi. Amma nə edəsən ki, işimə olan sevgim bəzən mənim həyata olan sevgimi üstələyir. Qalib xalqın yanında olmaq, şəhid və qazi ailələri ilə görüşmək, erməni terrorundan əziyyət çəkmiş insanlarla görüşmək üçün günlərlə, bəzən də sutkalarla gərgin işləmək, neçə-neçə insanla görüşmək lazım gəlirdi. Bilirdim ki, risk edirəm, həyatımı təhlükəyə atıram. Amma yenə də irəli gedirdim. Bu da nəticəsi. Çoxları kimi mən də COVID-19-a yoluxdum və indi də xəstəxanadayam. Mənim üçün dua edin dostlar..."