Akademik Zərifə Əliyeva adına Milli Oftalmologiya Mərkəzinin Səyyar Avtomobil Klinikası tərəfindən, Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin təşkilatçılığı ilə Xocasən qəsəbəsində tibbi aksiya keçirilib.
Aztibb.az xəbər verir ki, aksiya çərçivəsində ümumilikdə 200 nəfər oftalmoloji müayinədən keçirilib. Sakinlərə yerində ixtisaslaşmış tibbi xidmət göstərilib, görmə sağlamlıqları qiymətləndirilib və müayinələrin nəticələrinə uyğun olaraq müvafiq tibbi tövsiyələr verilib. Zərurət yarandığı hallarda vətəndaşlar əlavə müayinə və müalicəyə yönləndirilib.
Təşəbbüsün əsas məqsədi xüsusilə tibbi xidmətlərə çıxış imkanları məhdud olan əhali qruplarının ixtisaslaşmış oftalmoloji müayinələrdən yararlanmasını təmin etmək olub.
Müayinələr Akademik Zərifə Əliyeva adına Milli Oftalmologiya Mərkəzinin həkimləri Dr. Nuranə Ələkbərova, Dr. Fidan Nağıyeva, Dr. Cəmilə Səmədova, Dr. Aynur Ağayeva, eləcə də həkim-rezidentlər Dr. Amina Abdullayeva və Dr. Fuay Məmmədova tərəfindən aparılıb.
Tibbi aksiyada Səyyar Klinikanın baş həkimi Dr. Elçin Həsənov, mühəndis Tural Hüseynov, Təşkilat şöbəsinin əməkdaşları Leyla Qurbanova və Züleyxa Yusifova, həmçinin sürücü Vasif Nəsirov da iştirak ediblər.

