Füzuli Rayon Mərkəzi Xəstəxanasının Horadiz Ailə Sağlamlıq Mərkəzində uşaqların sağlamlığının qorunması, fiziki inkişafının izlənilməsi və yoluxucu xəstəliklərin qarşısının alınması məqsədilə profilaktik müayinələr və peyvəndləmə tədbirləri ardıcıl olaraq davam etdirilir.
Aztibb.az xəbər verir ki, bu prosesdə mərkəzə müraciət edən hər bir azyaşlının tibbi vəziyyəti xüsusi diqqətdə saxlanılır.
Həkim-pediatr Vüsalə İsayeva tərəfindən uşaqların ümumi sağlamlıq vəziyyəti hərtərəfli yoxlanılır və yaşlarına uyğun zəruri müayinələr aparılır. Eyni zamanda valideynlərə övladlarının sağlam böyüməsi və peyvəndlərin əhəmiyyəti barədə ətraflı maarifləndirici məlumatlar verilir.
Milli Peyvənd Təqviminə tam uyğun olaraq iki aylıq körpələrə Heksaksim və PK peyvəndləri, altı aylıq körpələrə isə PK və OPV peyvəndləri tətbiq olunur. Bu da uşaqlar arasında immunizasiya prosesinin vaxtında və düzgün icrasını təmin edir.
Bütün bu məqsədyönlü tədbirlər uşaqların sağlam böyüməsi, yoluxucu xəstəliklərdən etibarlı şəkildə qorunması və sağlam gələcəyin təmin edilməsi baxımından mühüm əhəmiyyət daşıyır. Sağlam gələcəyimiz naminə uşaqlarımızı vaxtında qoruyaq.

