Səhiyyə Nazirliyi Əziz Əliyev adına Azərbaycan Dövlət Həkimləri Təkmilləşdirmə İnstitutu (ADHTİ) ilə Astana Tibb Universiteti arasında bağlanan memoranduma uyğun olaraq akademik təcrübə proqramı çərçivəsində Astana Tibb Universitetinin 10 həkim-rezidenti ADHTİ-də iki həftəlik təcrübə proqramında iştirak ediblər.

 

ADHTİ-dən Aztibb.az-a bildirilib ki, proqramın sonunda institutun Beynəlxalq əlaqələr üzrə prorektoru, dosent Rüfət Hüseynli və Rezidentura təhsili üzrə prorektoru, tibb elmləri doktoru Məhəmməd Davudov rezidentlərlə görüşüblər.

 

Görüş zamanı qonaq-rezidentlərə təcrübə proqramını uğurla başa vurmaları münasibətilə sertifikatlar təqdim olunub, onların təcrübə müddətində əldə etdikləri bilik və bacarıqlar, eləcə də proqramla bağlı təəssüratları dinlənilib.

 

Astana Tibb Universitetinin həkim-rezidentləri institutda keçdikləri təcrübədən məmnunluqlarını ifadə edərək yaradılan şəraitə və əldə etdikləri praktiki biliklərə görə təşəkkürlərini bildiriblər.