Azərbaycan Tibb Universiteti (ATU) Zəfər Gününə həsr olunmuş ənənəvi VI “Qələbə qaçışı”nda təmsil olunub.
ATU-dan Aztibb.az-a bildirilib ki, Gənclər və İdman Nazirliyi, Bakı Şəhər Halqası Əməliyyat Şirkəti və Azərbaycan Atletika Federasiyasının birgə təşkilatçılığı ilə “Qürurla irəli” şüarı altında baş tutan xeyriyyə tədbirində ATU-nun müxtəlif fakültə və kurslarında təhsil alan 10 tələbə iştirak edib. Tələbələrin yarışa hazırlığı və iştirakı “Təbib” Tədris İdman Mərkəzinin atletika üzrə məşqçi-müəllimi Xatirə Şıxlının rəhbərliyi və məşqçi dəstəyi ilə həyata keçirilib.
Dənizkənarı Milli Parkda, “Yeddi gözəl” fəvvarəsinin yaxınlığından start götürən qaçış iştirakçıları 10 kilometrlik məsafəni qət edərək finiş xəttinə çatıblar. Yarışda 2000-dən çox iştirakçı mübarizə aparıb, onlardan 1494 nəfər finişə çatıb. ATU-nu təmsil edən Mahsa Palar, Paria Bagherian, Alena Abraham, Saifudeen Sabu, Zoobin Partoo, Əli Süleymanov, Smrati Yadav, Vijendra Yadav, Aga Ragimov və Yasmin Akdağ da 10 kilometrlik məsafəni uğurla başa vuranlar sırasındadır. Finişə çatan bütün tələbələr medallarla təltif olunub.
Tələbələrin belə kütləvi idman tədbirlərində iştirakı onların fiziki hazırlığının, dözümlülük və iradə keyfiyyətlərinin inkişafına, sağlam həyat tərzinin təşviqinə xidmət edir. Bu təşəbbüs BMT-nin Dayanıqlı İnkişaf Məqsədlərindən 3-cü məqsəd – Sağlam həyat və rifah istiqamətinə də uyğun gəlir.
Qeyd edək ki, xeyriyyə məqsədilə keçirilən “Qələbə qaçışı”ndan əldə olunan vəsait “YAŞAT” Fonduna ianə ediləcək.
