Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzindən Aztibb.az-a bildirilib ki, tədbirdə orqan donorluğunun əhəmiyyəti, ölkəmizdə transplantasiya sahəsində əldə olunan nailiyyətlər və inkişaf perspektivləri müzakirə edilib.

 

Maarifləndirici görüşün ardınca gənc həkimlər və rezidentlər üçün heyvan ürəkləri üzərində praktik transplantasiya kursu keçirilib.

 

Kursa professor Kamran Musayev, Azərbaycan Ürək və Damar Cərrahiyyəsi Cəmiyyətinin sədri, tibb elmləri doktoru Ramil Əliyev, həmçinin Böyük Britaniyada uzun illər fəaliyyət göstərmiş, ürək transplantasiyası üzrə beynəlxalq səviyyədə tanınmış mütəxəssis professor Asghar Khagani qatılıb.

 

Mütəxəssislər ürək transplantasiyası sahəsində bilik və təcrübələrini gənc həmkarları ilə bölüşüb, praktik məşğələlər zamanı müasir cərrahi yanaşmaları nümayiş etdiriblər.

 

Tədbirin əsas məqsədi gənc tibb mütəxəssislərinin peşəkar inkişafına dəstək göstərmək, transplantasiya sahəsində bilik və bacarıqlarını artırmaq, eləcə də cəmiyyətdə orqan donorluğu ilə bağlı maarifləndirməni təşviq etmək olub.