Milli peyvənd təqviminə əsasən qızılcaya qarşı immunizasiya 1 və 6 yaşlarında olmaqla 2 doza şəklində kombinə olunan QPM (qızılca, parotit, məxmərək) peyvəndi ilə aparılır.

Aztibb.az xəbər verir ki, qızılcadan qorunmanın ən effektiv və yeganə yolu peyvənd olunmaqdır. Hər iki dozanı vaxtında alan şəxslərdə bu infeksiyalara qarşı 97%-ə qədər yüksək və uzunmüddətli immunitet formalaşır.

Parotit də qızılca kimi yüksək yoluxuculuğa malik virus mənşəli xəstəliklərdəndir. Parotit ciddi fəsadlara, o cümlədən eşitmə qabiliyyətinin itirilməsinə, ürək problemlərinə və baş beyin, onurğa beyninin zədələnməsinə gətirib çıxara bilər.

Məxmərək də virus mənşəli yoluxucu infeksiyalar qəbiləsindəndir. Məxmərək də qızılca və parotit kimi yoluxmuş şəxsin öskürüb asqırması ilə keçir.

Bu xəstəliklər ağır fəsadlara səbəb ola, hətta ölümlə nəticələnə bilər.

QPM peyvəndi etdirin, uşaqlarınızı ağır xəstəliklərdən qoruyun!