Türkiyədə son sutka ərzində koronavirusdan (COVID-19) 168 nəfər ölüb.
Bu barədə Türkiyənin Səhiyyə naziri Fəxrəddin Qoca mətbuat konfransında son koronavirus statistikasını açıqlayarkən bildirib.
Nazir açıqlamasında qeyd edib ki, son 24 saatda 164 547 şübhəli koronavirus testindən keçib, onlardan 6814-nin cavabı pozitiv çıxıb, 3911 xəstə isə sağalaraq evə buraxılıb.
O, son 3,5 ayda ağır xəstə sayının 9 dəfə artdığını bildirib: “Ağır xəstə sayımız 4641 nəfər olub. Vəziyyət son dərəcə gərgindir. Ölüm sayı da bu gün ən yüksək rəqəmdir. Türkiyədə indiyədək 467 730 nəfəri yeni növ koronavirus infeksiyasına yoluxub, 12 840 nəfər ölüb”.
F.Qoca deyib ki, ölkədə pandemiya yeni mövsümdə sürətlə artdığı üçün Türkiyədə COVID-19 testi kütləvi hal alacaq: “Bir gündə 200 mindən çox insan testdən keçirilməsi nəzərdə tutulub”.
