Yeni növ koronavirus (COVID-19) infeksiyasına qarşı peyvənd və digər müalicə vasitələrinin tapılmadığı şəraitdə yeganə yol yalnız hər kəsin karantin qaydalarına ciddi şəkildə əməl etməsindən ibarətdir. Həmin qaydalar isə əllərin yuyulması, respirator etiketi, maska taxılması və sosial məsafənin gözlənilməsidir. Lakin bu qaydalara tələb olunan səviyyədə əməl olunmaması yoluxma sayında artıma səbəb olur.

Aztibb.az xəbər verir ki, bu fikirləri həkim-terapevt Sevinc Əhmədova son günlər yoluxanların artma səbəbindən danışarkən deyib: “Məsələn, əksər hallarda müalicə müəssisəsinə üz tutan xəstə bayırda maska taxır, həkimin yanına girəndə onu çıxarır, yaxud kassaya maska ilə yaxınlaşır, danışanda maskanı aşağı salır və danışır. Özündə xəstəliyin əlamətlərini hiss edən şəxs evdən bayıra çıxaraq işə gedir və ya qonaqlıqda iştirak edir. Yaxud müalicə olunan xəstə bir həftə sonra səhhətində bir az yaxşılaşma baş verən kimi çölə-bayıra çıxaraq ətrafdakıları yoluxdurur. Lakin xəstəliyin lap əvvəlində 14 günlük karantin müddəti olduğu deyilirdi, indi 21 gün karantinə əməl olunması deyilir. Nə qədər ki, karantin qaydalarına əməl etməyənlər, mövcud gigiyenik tələblərə etinasız yanaşanlar var, koronavirus həyatımızdan çəkilib getməyəcək. Məsuliyyətsizlik nəticəsində başqalarının da yoluxması, xəstələnməsi və fəsadla üzləşməsinə səbəb olanlar isə mütləq ictimai qınağa tuş olmalı və hətta cəzalandırılmalıdır.

Həkim-terapevt onu da qeyd edib ki, xəstəliyi yüngül keçirən əksər koronaviruslu xəstələrdə temperatur bir, ya iki gün davam edir: “Doğrudur, bəzən hətta sağalandan sonra bir ay temperaturu, öskürəyi davam edən xəstələrlə də üzləşirik. Təəssüf ki, bəzən uşaqların guya xəstəliyə yoluxmadığı və daşıyıcı olmadığı barədə fikirlər dolaşır. Lakin bu, qətiyyən düzgün fikir deyil. Çünki bizim ölkəmizdə belə kiçik yaşlı uşaqların yoluxduğu barədə statistika var. Dünyada altı aylıq, hətta yeni doğulan körpənin belə xəstəliyə yoluxması barədə faktlar var. Lakin fərq ondadır ki, uşaqlar xəstəliyi böyüklər kimi ağır yox, sadə qrip əlamətləri ilə keçirərək sağalırlar.

İndiki dövrdə qidalanma zamanı C vitamini ilə zəngin sitrus meyvələrindən çox istifadə etmək lazımdır. Həmin meyvələrə qarşı allergiyası olanlar isə kartof, bolqar bibəri, gül və brokkoli kələmindən istifadə edə bilərlər. Eyni zamanda xörəklərdə soğan və sarımsaqdan istifadə etmək də faydalıdır. Paxlalı bitkilər də təbii immunomodulyator sayılır və ondan istifadə etmək də səmərəlidir. Həftədə iki-üç dəfə ondan istifadə etmək olar”.

Həkim-terapevt antiseptik vasitələr barədə danışarkən deyib: “Spirtdən çox istifadə edilməsi dəridə çat və quruluq yaradır və hətta dermatitə aparıb çıxarır. Ona görə daha çox dezinfeksiyaedici maddələrdən istifadə edilməsi məsləhətdir. Hətta xüsusi antibakterial sabunlardan bir müddət çox istifadə edəndə dəri təbəqəsi mikroblara qarşı olan təsirini itirmiş olur və qorumur. Bunun baş verməməsi üçün antiseptik vasitələrini dəyişmək, başqa növlərdən istifadə etmək lazımdır”.