Azərbaycan Tibb Universitetinin (ATU) rektoru, professor Gəray Gəraybəyli “Times Higher Education” (THE) qlobal ali təhsil platformasının Böyük Britaniya və Avropa üzrə kommersiya direktoru Laçın Italmazovanı qəbul edib.
Universitetdən Aztibb.az-a bildirilib ki, görüşdə ATU-nun ilk dəfə “Times Higher Education World University Rankings” (THE WUR) – Dünya Universitetləri Reytinqində yer alması, universitetin beynəlxalq reytinq platformalarına inteqrasiyası və qlobal akademik məkanda mövqeyinin daha da gücləndirilməsi istiqamətində görüləcək işlər, həmçinin beynəlxalq rəqabətqabiliyyətliliyin artırılması istiqamətində qarşıda duran prioritetlər müzakirə olunub.
Rektor Gəray Gəraybəyli ATU-nun THE Dünya Universitetləri Reytinqinə ilk dəfə daxil olmasını mühüm institusional nailiyyət kimi qeyd edib. O bildirib ki, bu nəticə qarşıdakı dövr üçün daha böyük hədəflərin müəyyənləşdirilməsi və universitetin fəaliyyətinin bütün istiqamətlər üzrə təkmilləşdirilməsi baxımından yeni mərhələnin başlanğıcıdır.
ATU rəhbəri universitetin beynəlxalq reytinqlərdə mövqeyinin daha da yaxşılaşdırılması, elmi-tədqiqat fəaliyyətinin, akademik göstəricilərin, beynəlxalq əməkdaşlıqların və institusional reputasiyanın gücləndirilməsinın qarşıda duran prioritetlər sırasında olduğunu diqqətə çatdırıb. Qeyd olunub ki, bu baxımdan digər nüfuzlu beynəlxalq reytinqlərdə də fəal iştirakın təmin edilməsi və məqsədyönlü strategiyanın həyata keçirilməsi xüsusi əhəmiyyət daşıyır.
Gəray Gəraybəyli ATU-nun tarixi və uğurlu debütündə “Times Higher Education” tərəfindən göstərilən metodiki dəstəyin mühüm rol oynadığını vurğulayıb və bu əməkdaşlığa görə təşəkkürünü bildirib. O, universitetin reytinq göstəricilərinin daha da yaxşılaşdırılması, beynəlxalq qiymətləndirmə mexanizmlərinin tətbiqi və bu istiqamətdə uzunmüddətli yol xəritəsinin formalaşdırılması ilə bağlı təşkilatın təcrübəsi ilə maraqlanıb.
Laçın Italmazova ATU-nun ilk dəfə “Times Higher Education World University Rankings”-də yer alması münasibətilə universitet rəhbərliyini təbrik edib. O, ali təhsil müəssisələrinin beynəlxalq strategiyalarının formalaşdırılması, reputasiyanın idarə olunması, akademik heyətin prosesə cəlb edilməsi, həmçinin reytinq göstəricilərinin inkişaf etdirilməsi üçün tətbiq olunan yanaşmalar barədə məlumat verib.
THE nümayəndəsi qeyd edib ki, təşkilatın reytinq sistemlərində universitetlərin qlobal rəqabətqabiliyyətliliyini qiymətləndirən göstəricilər bir neçə əsas istiqamət üzrə qruplaşdırılır. Bu göstəricilərin gücləndirilməsi üçün ali təhsil müəssisələrinə metodiki dəstəyin göstərilməsi və inkişaf istiqamətlərini müəyyənləşdirən yol xəritələrinin hazırlanması da əməkdaşlığın mühüm komponentlərindəndir.
Görüş zamanı ATU-nun digər beynəlxalq reytinqlərdə iştirak imkanları, universitetin qlobal akademik reputasiyasının gücləndirilməsi və “Times Higher Education”-ın beynəlxalq tədbirləri çərçivəsində əməkdaşlığın genişləndirilməsi məsələləri də müzakirə olunub.
L.Italmazova professor Gəray Gəraybəylini “Times Higher Education” tərəfindən təşkil olunan müxtəlif beynəlxalq tədbirlərdə, o cümlədən Madriddə keçirilməsi planlaşdırılan Avropa Sammitində spiker qismində iştirak etməyə dəvət edib.
Görüş qarşılıqlı maraq doğuran məsələlər ətrafında fikir mübadiləsi və ATU ilə “Times Higher Education” arasında əməkdaşlığın yeni istiqamətlər üzrə davam etdirilməsi barədə müzakirələrlə yekunlaşıb.
