Azərbaycan Tibb Universitetinin (ATU) əməkdaşları “Süni intellekt, sosial transformasiya və elmi tərəqqi” (Artificial Intelligence, Social Transformation and Scientific Progress – ICASST-2026) mövzusunda Bakıda keçirilən IV Beynəlxalq Konfransda elmi məruzələrlə çıxış ediblər.
ATU-dan Aztibb.az-a bildirilib ki, Research Consultancy on Social and Management Development (RCSMD) təşkilatının təşkilatçılığı ilə baş tutan konfransa ATU-nun dosentləri İsmayıl Qafarov, Mahirə Əmirova, Həyat Əliyeva, dr. Hafiz Osmanov və dr. Kamala Bədəlova qatılıb.
Tədbir çərçivəsində süni intellektin elmi tədqiqatlarda tətbiqi, sosial və texnoloji transformasiya proseslərinə təsiri, müxtəlif fəaliyyət sahələrində yaratdığı imkanlar, eləcə də bu texnologiyalardan istifadənin elmi və etik aspektləri müzakirə olunub.
Beynəlxalq panel müzakirəsində iştirak edən dosent İsmayıl Qafarov ATU-da fəaliyyət göstərən Data-analitika və Süni İntellekt laboratoriyasının fəaliyyəti, əsas elmi istiqamətləri və tibbi məlumatların təhlilində süni intellekt texnologiyalarının tətbiqi üzrə görülən işlər barədə məlumat verib.
Konfransın sonunda ATU nümayəndələrinə sertifikatlar, dosent İ.Qafarova isə konfransda fəxri qonaq və əsas məruzəçi statusunda iştirakını təsdiqləyən xüsusi sertifikat verilib.
Konfransda ATU əməkdaşlarının iştirakı və təqdim olunan elmi fəaliyyətlər BMT-nin Dayanıqlı İnkişaf Məqsədlərindən 4-cü (Keyfiyyətli təhsil), 9-cu (Sənaye, innovasiya və infrastruktur) və 17-ci (Məqsədlər üçün tərəfdaşlıq) məqsədlərə uyğun olmaqla, elmi biliklərin mübadiləsinə, innovativ texnologiyaların inkişafına və beynəlxalq elmi əməkdaşlığın genişləndirilməsinə töhfə verib.

