Qulaq küyünün (tinnitus) geniş yayılan bir hal olduğunu bildirən qulaq-burun-boğaz (LOR) mütəxəssisi Özer bu simptomun bəzi hallarda ciddi xəstəliklərin əlaməti ola biləcəyini deyib.

Aztibb.az "CNN Türk"ə istinadfən yazır ki, onun sözlərinə görə, xüsusilə bir tərəfli qulaq küyü nadir hallarda eşitmə siniri şişi kimi mühüm xəstəliklərlə əlaqəli ola bilər.

Xalq arasında geniş yayılan qulaq küyü (tinnitus) bəzi hallarda ciddi xəstəliklərin xəbərçisi ola bilər. Başkent Universitetinin Adana Dr. Turgut Noyan Tətbiq və Araşdırma Mərkəzinin Qulaq-Burun-Boğaz kafedrasının müəllimi, dosent doktor Fulya Özer xüsusilə bir tərəfli qulaq küyünün diqqətdən kənarda saxlanılmaması və mütləq qiymətləndirilməsi lazım olduğunu bildirib.

Özer qeyd edib ki, xalq arasında “kimsə məni xatırlayır” kimi yozulan qulaq küyü əksər hallarda beynin eşitmə siqnallarını fərqli şəkildə emal etməsi ilə əlaqədardır. Xüsusilə yüksək səs-küyə məruz qalma daxili qulaqdakı hüceyrələrə zərər verə bilər. Beyin bu çatışmazlığı kompensasiya etməyə çalışarkən qulaqda küy yarana bilər.

Mütəxəssis vurğulayıb ki, bir tərəfli qulaq küyü isə şişlər də daxil olmaqla ciddi xəstəliklərin əlaməti ola bilər və mütləq tibbi qiymətləndirmədən keçirilməlidir. Müalicədə məqsəd yalnız səsi aradan qaldırmaq deyil, eyni zamanda pasiyentin həyat keyfiyyətini yaxşılaşdırmaqdır.

“Psixiatriya dəstəyinə yönləndiririk”

Özer qulaq küyünün həyat keyfiyyətinə ciddi təsir göstərə və güclü narahatlığa səbəb ola biləcəyini bildirib.

“Yüksək səsli mühitdə uzun müddət qalmaq daxili qulaqdakı hüceyrələrə zərər verə bilər. Klinik şəraitdə müxtəlif qiymətləndirmə şkalaları və sorğular vasitəsilə qulaq küyünün insanın gündəlik həyatına nə dərəcədə təsir etdiyini müəyyənləşdiririk. Zəruri hesab etdiyimiz hallarda isə pasiyentləri psixiatriya dəstəyinə yönləndiririk”, – deyə mütəxəssis bildirib.