Katarakta əməliyyatından sonra gözün düzgün və sağlam şəkildə bərpası üçün həkimin tövsiyələrinə riayət etmək mühüm əhəmiyyət daşıyır.

Aztibb.az xəbər verir ki, Türkiyənin nüfuzlu Gülhanə Hərbi Tibb Akademiyası (GEAH) məzunu, uzman oftalmoloq-cərrah Dr. Rahib İsmayılovun sözlərinə görə, əməliyyatdan sonrakı dövrdə gözə düzgün qulluq edilməsi sağalma prosesinin problemsiz keçməsinə kömək edir.

Mütəxəssis bildirir ki, əməliyyatdan sonra həkim tərəfindən təyin olunan göz damcıları vaxtında və düzgün istifadə edilməli, gözlər qorunmalı və kifayət qədər istirahət etdirilməlidir. Gündəlik fəaliyyətlərə isə yalnız həkimin icazəsi ilə tədricən qayıtmaq və kontrol müayinələrini vaxtında keçmək vacibdir.

Əməliyyatdan sonra gözü qaşımaq və ya ovuşdurmaq, gözə təzyiq göstərmək, həkim məsləhəti olmadan hər hansı göz damcısından istifadə etmək olmaz. Həmçinin ağır fiziki fəaliyyət və yük qaldırmaqdan çəkinmək, gözə su, toz və digər qıcıqlandırıcıların düşməsinə imkan verməmək tövsiyə olunur.

Əməliyyatdan sonrakı dövrdə güclü ağrı, görmənin kəskin azalması, intensiv qızartı və ya digər narahatedici əlamətlər yaranarsa, vaxt itirmədən həkimə müraciət edilməlidir.

Qeyd edək ki, katarakta əməliyyatları Diaqnoz Tibb Mərkəzində uzman oftalmoloq-cərrah Dr. Rahib İsmayılov tərəfindən həyata keçirilir.