Bel və yan nahiyəsində yaranan ağrı böyrəklərlə bağlı problemin əlaməti ola bilər. Bu ağrı xüsusilə güclü və davamlı olduqda diqqətdən kənarda qalmamalıdır.

 

Bu barədə Aztibb.az-a məlumat verən Ağcabədi RMX-nın nefroloqu Bakir Bünyadov bildirib ki, böyrək daşı, böyrək infeksiyası və digər xəstəliklər bel və yan nahiyəsində ağrıya səbəb ola bilər. Ağrı ilə yanaşı sidikdə qan, sidik ifrazı zamanı yanma, tez-tez sidiyə getmə, yüksək hərarət, üşütmə və ürəkbulanma müşahidə olunarsa, həkimə müraciət etmək vacibdir.

 

Onun sözlərinə görə, bəzi böyrək xəstəlikləri isə uzun müddət heç bir aşkar əlamət verməyə bilər. Buna görə şikayətlər təkrarlanarsa və ya davam edərsə, vaxtında tibbi müayinədən keçmək vacibdir. Erkən diaqnostika böyrək xəstəliklərinin ağırlaşmasının qarşısını almağa kömək edir.