Süni intellekt orqanların müxtəlif sürətlə qocaldığını ortaya qoydu. Ağciyər və böyrəklər gənc yaşlarda daha erkən qocalma əlamətləri göstərir.

Aztibb.az "Medical media" nçəşrinə istinadən yazır ki, tibb dünyasında mühüm yenilik hesab olunan yeni araşdırma insan orqanizmindəki orqanların bioloji baxımdan eyni sürətlə qocalmadığını ortaya qoyub. Avstriya Elmlər Akademiyasının CeMM Molekulyar Tibb Tədqiqat Mərkəzi və Vyana Universitetinin birgə apardığı araşdırma çərçivəsində süni intellektdən istifadə etməklə “toxuma saatları” hazırlanıb.

Genotip-Toxuma İfadəsi Layihəsi (GTEx) çərçivəsində 983 şəxsdən götürülmüş 40 müxtəlif toxuma növünə aid 25 mindən çox yüksək keyfiyyətli mikroskopik görüntü kompüter görmə modelləri vasitəsilə təhlil edilib. Sistem orqanların bioloji yaşını cəmi 4,9 illik xəta payı ilə hesablamağı bacarıb.

Xroniki xəstəliklər qocalma prosesini sürətləndirir

Araşdırmanın nəticələrinə görə, ağciyər, böyrək və mədəaltı vəzi kimi orqanlarda 20–40 yaş aralığında erkən qocalma əlamətləri müşahidə olunur. Uşaqlıq toxumasında isə qocalma prosesinin menopauza dövründə sürətləndiyi müəyyən edilib.

Bundan əlavə, böyrək çatışmazlığı və diabet kimi xroniki xəstəliklərin toxumaların qocalmasını birbaşa sürətləndirdiyi müəyyən olunub.

Araşdırmanın digər mühüm nəticəsi toxumalarda qocalma izlərinin qan analizi vasitəsilə müəyyən edilə bilməsidir. Bu yeni yanaşma sayəsində Alzheimer xəstəliyi, Kron xəstəliyi və insult kimi xəstəliklərlə əlaqəli qocalma nümunələrinin hələ klinik əlamətlər ortaya çıxmamışdan əvvəl müəyyənləşdirilməsi mümkün ola bilər.