Praqa şəhərində keçirilən “FDI World Dental Congress 2026” çərçivəsində Azərbaycan Tibb Universitetinin (ATU) tələbələrinin hazırladığı dörd elmi iş qəbul olunaraq beynəlxalq konqres iştirakçılarına təqdim edilib.
Bu barədə Aztibb.az-a universitetdən xəbər verilib.
Bildirilib ki, beynəlxalq stomatologiya ictimaiyyətinin nüfuzlu elmi platformalarından biri olan konqresdə ATU-nun V kurs tələbələri Emad Keyvani və Mehin Rashtiyeva elmi tədqiqatlarının nəticələri ilə tədbir iştirakçılarını tanış ediblər.
Belə ki, Emad Keyvani tərəfindən üç elmi məruzə təqdim olunub. Onun “Milan System for Risk Stratification in Salivary Gland Masses” adlı məruzəsində tüpürcək vəzilərində kütlələrin risk stratifikasiyasında Milan sisteminin tətbiqi, “Mandibular Trabecular Changes After RME and Facemask Therapy” adlı tədqiqatında RME və facemask terapiyasından sonra mandibulyar trabekulyar sümükdə baş verən dəyişikliklər, “Optimal Convergence Angle for Monolithic Zirconia Crowns and Marginal Fit” adlı məruzəsində isə monolit zirkon kronlar üçün optimal konvergensiya bucağı və marginal uyğunluq məsələləri araşdırılıb.
Mehin Rashtiyeva isə “Azerbaijani Dental Students’ Attitudes and Perceptions Toward AI in Prosthodontics” adlı elmi məruzə ilə çıxış edib. Tədqiqatda Azərbaycanlı stomatologiya tələbələrinin protezləşdirmə sahəsində süni intellekt texnologiyalarına münasibəti və bu texnologiyaların tətbiqi ilə bağlı yanaşmaları öyrənilib.
Tələbələrin elmi işlərinin “FDI World Dental Congress 2026” kimi beynəlxalq səviyyəli elmi tədbirdə qəbul olunaraq təqdim edilməsi Azərbaycan Tibb Universitetində tələbə elmi fəaliyyətinə və tədqiqat yönümlü təhsilə göstərilən diqqətin nəticələrindən biridir. Bunda əlavə, ATU tələbələrinin beynəlxalq elmi tədbirlərdə təmsil olunması onların elmi və peşəkar inkişafına töhfə verir. Həmçinin universitetdə aparılan tələbə tədqiqatlarının beynəlxalq akademik mühitdə təqdimatına imkan yaradır.
