Yuxu iflici mərkəzi sinir sisteminin fəaliyyətindəki pozuntularla əlaqəli ola bilər

Yuxu iflici yuxu ilə oyaqlıq arasındakı keçid zamanı insanın şüuru bərpa olunsa da, müəyyən müddət ərzində hərəkət edə bilməməsi ilə xarakterizə olunan vəziyyətdir. Bu zaman insan özünü ayıq hiss edir, lakin ətraflarını hərəkət etdirə bilmir.

Aztibb.az "Life" portalına istinadən yazır ki,Nevroloq Aleksandr Komarovun sözlərinə görə, belə epizodların yaranma səbəbini müəyyənləşdirmək vacibdir. Mütəxəssis mümkün amillər arasında kəllədaxili hipertenziyanı, intoksikasiya sindromunu, sinaptik ötürülmənin anadangəlmə pozuntularını və travmalardan sonra mərkəzi sinir sisteminin funksiyalarında yaranan dəyişiklikləri qeyd edib.

Həkim bildirib ki, yuxu iflicini müstəqil şəkildə dayandırmaq üçün universal üsul yoxdur. Bu, vəziyyətin dərinliyindən asılıdır. Səthi epizod zamanı insan ayaq barmağını hərəkət etdirməyə və ya göz əzələlərini işə salmağa cəhd edə bilər. Bu, hərəkət funksiyalarının aktivləşməsinə və vəziyyətdən çıxmağa kömək edə bilər.

Daha dərin yuxu iflici zamanı isə bu üsullar mümkün olmaya bilər. Belə hallarda epizodun öz-özünə başa çatmasını gözləmək lazım gəlir.

Onun bildirdiyinə görə, yuxu iflici zamanı panika vəziyyəti daha da ağırlaşdıra bilər. Hərəkət edə bilməmək güclü qorxu, ürəkdöyünmə və arterial təzyiqin yüksəlməsinə səbəb ola bilər.

Mütəxəssis qeyd edib ki, insan yuxu iflici zamanı hərəkət etməyə məcbur etmək əvəzinə, vəziyyətin keçici olduğunu anlamalı və panikaya yol verməməlidir. Səthi epizodlarda müəyyən hərəkətlərin aktivləşdirilməsi mümkün olsa da, dərin yuxu iflicində əsas yanaşma vəziyyətin başa çatmasını gözləməkdir.