Böyük döş ölçüsü olan qadınlarda xroniki miqren, boyun ağrısı, boyun sinirlərinin sıxılması və yuxu zamanı tənəffüs pozğunluqlarına daha çox rast gəlinə bilər.

Aztibb.az xəbər verir ki, bu nəticələr "Headache: The Journal of Head and Face Pain" jurnalında dərc olunan araşdırmada yer alıb.

Wake Forest Universitetinin Tibb fakültəsindən Kristin Pokokun rəhbərlik etdiyi tədqiqatda 2017–2024-cü illərdə ABŞ-ın Kaliforniya ştatında nevroloji klinikalara müraciət edən 23 288 qadının məlumatları araşdırılıb. Onlardan 347-də süd vəzisi toxumasının həddindən artıq böyüməsini göstərən diaqnostik kod müəyyən edilib. Nəticədə yaşı, bədən kütlə indeksi və digər göstəriciləri nəzərə alınmaqla 687 qadının məlumatları müqayisə olunub.

Nəticələrə görə, digər amillər nəzərə alındıqdan sonra makromastiyası olan qadınlarda xroniki miqren təxminən 40 faiz, boyun ağrısı iki dəfə, boyun radikulopatiyası isə iki dəfədən çox daha çox müşahidə edilib. Obstruktiv yuxu apnesi də bu qrupda təxminən 50 faiz daha çox olub.

Tədqiqatçılar mümkün əlaqəni döş toxumasının boyun və döş qəfəsinə yaratdığı fiziki yüklə, həmçinin tənəffüsə təsiri ilə izah edən əvvəlki araşdırmalara istinad edirlər. Bununla belə, döş kiçiltmə əməliyyatının miqren və digər baş ağrılarını aradan qaldırıb-qaldırmadığı bu tədqiqatda müəyyən edilməyib.

Alimlər vurğulayırlar ki, araşdırma tibbi qeydlərin geriyə dönük təhlilinə əsaslandığından səbəb-nəticə əlaqəsini sübut etmir. Makromastiyanın müalicəsinin baş ağrısı və digər simptomlara təsirini müəyyənləşdirmək üçün əlavə, uzunmüddətli tədqiqatlara ehtiyac var.