Yeni araşdırmaya görə, tənhalıq və sosial təcrid insanın xəstəliksiz yaşadığı illərin sayını əhəmiyyətli dərəcədə azalda bilər.

Aztibb.az xəbər verir ki, tədqiqatın nəticələri "Nature Communications" jurnalında dərc olunub.

Alimlər 40–69 yaş arasında olan 277 mindən çox insanın sağlamlıq göstəricilərini araşdırıblar. İştirakçılar diabet, ürək-damar xəstəlikləri, ağciyər xəstəlikləri, demensiya, xərçəng, depressiya və təşviş pozuntusu kimi yeddi əsas xəstəlikdən əziyyət çəkməyən şəxslər olub.

Nəticələr göstərib ki, həm tənhalıq, həm də sosial təcrid yaşayan qadınlar 50 yaşdan sonra orta hesabla 2,4 il, kişilər isə 1,7 il daha az xəstəliksiz həyat keçiriblər. Psixi sağlamlıq baxımından fərq daha böyük olub: qadınlarda bu göstərici 3,7 il, kişilərdə isə 5,8 il təşkil edib.

Tədqiqatçılar vurğulayırlar ki, sosial təcrid və tənhalıq eyni anlayış deyil. Sosial təcrid insanın digər şəxslərlə əlaqələrinin və ünsiyyətinin məhdud olması, tənhalıq isə mənalı sosial əlaqələrin çatışmazlığından yaranan narahatedici hiss kimi izah olunur. Bu səbəbdən insan sosial baxımdan təcrid olunmuş olsa da, özünü tənha hiss etməyə bilər.

Araşdırmada sağlam qidalanma, fiziki aktivlik, kifayət qədər yuxu və siqaretdən uzaq durmaq kimi sağlam həyat tərzi amillərinin sosial təcridlə əlaqəli xəstəliksiz həyat itkisini azaltdığı müəyyən edilib. Lakin bu amillər tənhalığın sağlamlığa təsirini əhəmiyyətli dərəcədə azaltmayıb.