Uzun müddət davam edən qarın ağrısı, köp və bağırsaq vərdişlərində dəyişiklik bəzən sadə həzm problemi kimi qiymətləndirilsə də, bu şikayətlərin səbəbi yoğun bağırsaq divarında yaranan divertikullar ola bilər.

Aztibb.az xəbər verir ki, cərrah-proktoloq və endoskopist Anar Əliyevin sözlərinə görə, divertikullar uzun müddət heç bir əlamət vermədən mövcud ola bilər, lakin iltihablaşdıqda divertikulit inkişaf edərək qarın ağrısı, hərarət və digər ciddi əlamətlərə səbəb ola bilər.

Mütəxəssis bildirib ki, divertikullara xüsusilə yaş artdıqca daha çox rast gəlinir. Bu səbəbdən uzunmüddətli və təkrarlanan bağırsaq şikayətlərini adi hal kimi qəbul etmək və müayinəni gecikdirmək düzgün deyil.

Həkim qeyd edib ki, bağırsaq sağlamlığının qorunması üçün yaranan şikayətlərin səbəbini vaxtında müəyyənləşdirmək və zəruri hallarda həkim müayinəsindən keçmək vacibdir.

Mütəxəssislər qarın ağrısı, köp və bağırsaq vərdişlərində davamlı dəyişikliklər müşahidə olunduqda özbaşına müalicə aparmaq əvəzinə həkimə müraciət etməyi tövsiyə edirlər.