Azərbaycan Tibb Universitetinin (ATU) Elmi Araşdırmalar Mərkəzinin Biokimya şöbəsinin müdiri, dosent Sevda Quliyevanın həmmüəllifi olduğu elmi məqalə nüfuzlu beynəlxalq “Acta Bio Medica” jurnalında dərc olunub. 

Bu məlumat Aztibb.az-a ATU-dan verilib.

Bildirilib ki, “Scopus” bazasında indekslənən və Q2 kvartilinə daxil olan jurnalda yayımlanan “First-trimester sFlt-1/PlGF ratio and oxidative stress markers in newborns: biochemical associations and early risk stratification” adlı tədqiqat hamiləliyin erkən mərhələsində aparılan biokimyəvi qiymətləndirmələrin perinatal risklərin proqnozlaşdırılmasındakı roluna diqqət çəkir. 

Tədqiqatın əsas istiqamətini hamiləliyin birinci trimestrində plasentar angiogenezin pozulması ilə yenidoğulmuşlarda oksidativ stress göstəriciləri arasındakı əlaqənin öyrənilməsi təşkil edib.  

Bu araşdırma ana–plasenta–döl sisteminin biokimyəvi mexanizmlərinin daha dərindən anlaşılmasına imkan verir. 
Əldə olunan nəticələr erkən angiogen və metabolik markerlərin birlikdə qiymətləndirilməsinin perinatal risklərin əvvəlcədən proqnozlaşdırılmasında əhəmiyyətli ola biləcəyini göstərir. 

Tədqiqatın nəticələri hamiləliyin erkən mərhələlərində ana və döl sağlamlığı üçün risklərin qiymətləndirilməsi istiqamətində yeni elmi yanaşmaların inkişafına töhfə verməklə yanaşı, plasentar funksiyanın və yenidoğulmuşların metabolik vəziyyətinin qarşılıqlı əlaqələrinin öyrənilməsi baxımından da əhəmiyyət daşıyır. 

Məqalənin “Acta Bio Medica” kimi beynəlxalq elmi platformada dərc olunması Azərbaycan Tibb Universitetində aparılan elmi araşdırmaların beynəlxalq elmi ictimaiyyətə təqdim olunması baxımından mühüm nailiyyətdir.