Myanmanın ən böyük şəhəri Yanqonda ağır ishal səbəbilə ən azı 500 nəfər xəstəxanaya yerləşdirilib. Onlardan 149 nəfərin vəba testi müsbət nəticə verib.
Aztibb.az "Channel news Asia" saytına istinadən yazır ki, Myanmada beş ildən artıqdır davam edən və 100 mindən çox insanın öldüyü təxmin edilən vətəndaş müharibəsi ölkənin infrastrukturunu və səhiyyə sistemini ciddi şəkildə zəiflədib. İqtisadi vəziyyət də ağır olaraq qalır.
Yanqon Regionunun sosial məsələlər üzrə naziri Bo Htay bildirib ki, avqustun 9-dan etibarən vəbanın əsas simptomu olan ishal səbəbilə 500 nəfər xəstəxanaya yerləşdirilib.
Onun açıqlaması ilk xəstələrin xəstəxanaya müraciət etməsindən bir həftədən çox vaxt keçdikdən sonra vəbanın epidemiyada rol oynadığını təsdiqləyən ilk rəsmi məlumat olub.
Nazirin sözlərinə görə, vəba üzrə ekspress testlər 149 müsbət nəticə göstərib. O, bu barədə ölkənin ən böyük şəhərini də əhatə edən Yanqon regionunun parlamentində çıxış edərkən məlumat verib.
Onlardan doqquzunda Vibrio cholerae bakteriyasının yaratdığı vəba infeksiyası Milli Səhiyyə Laboratoriyası tərəfindən rəsmi olaraq təsdiqlənib.
Vəba çirklənmiş qida və ya suyun qəbul edilməsi nəticəsində yaranan ağır bağırsaq infeksiyasıdır. Müalicə olunmadıqda xəstəlik bir neçə saat ərzində ölümə səbəb ola bilər.
Ümumdünya Səhiyyə Təşkilatı vəbanı “qlobal ictimai səhiyyə təhdidi” kimi xarakterizə edir və xəstəliyin sosial və iqtisadi bərabərsizliyi, eləcə də inkişaf səviyyəsindəki çatışmazlıqları əks etdirdiyini bildirir.
Nazirin sözlərinə görə, ötən cümə axşamı xəstəxanaya 100-dən çox yeni xəstə qəbul edilib, lakin bundan sonra yeni yoluxma hallarının sayı azalmağa başlayıb.
İshal şikayəti ilə xəstəxanaya yerləşdirilən 92 yaşlı xəstə vəfat edib. Lakin dövlətə məxsus Global New Light of Myanmar qəzeti bazar günü rəsmilərə istinadən yazıb ki, həmin şəxsin ölümünə əsasən ürək və ağciyər xəstəlikləri səbəb olub.
Qəzetin məlumatına görə, səhiyyə işçiləri xəstəliyin yayıldığı ərazilərdə epidemioloji nəzarət və epidemiyanın qarşısının alınması tədbirləri həyata keçirirlər.
