Konqo Demokratik Respublikasında (KDR) Ebola epidemiyası əvvəlki xəstəlik dalğalarını geridə qoyaraq ölkənin tarixində ən ağır epidemiya mərhələsinə çatıb. Yeni məlumatlara əsasən, təsdiqlənmiş yoluxma hallarının sayı 6 mini keçib, ölənlərin sayı isə 3 minə yaxınlaşıb.

Aztibb.az “Əl-Cəzirə” telekanalının məlumatın istinadən yazır ki, hazırda ölkədə sürətlə yayılan Ebola virusunun Bundibugyo ştamına qarşı təsdiqlənmiş vaksin və ya müalicə vasitəsi mövcud deyil.

BMT-nin baş katibi Antonio Quterreş hazırkı epidemiyanı “indiyədək qeydə alınmış ən sürətlə yayılan Ebola epidemiyası” adlandırıb. Virusla yoluxma hallarının sayı səhiyyə işçilərinin yeni yoluxmaları izləmək və onlara vaxtında cavab vermək imkanından daha sürətlə artır.

Afrika Xəstəliklərə Nəzarət və Profilaktika Mərkəzlərinin (Africa CDC) məlumatına görə, bunun səbəblərindən biri yeni yoluxmaların bir qisminin kontaktların izlənilməsi sistemi vasitəsilə müşahidə olunmayan insanlar arasında baş verməsidir.

KDR-in Kommunikasiyalar Nazirliyi sosial media hesabında bildirib ki, ölkədə 6 041 təsdiqlənmiş yoluxma qeydə alınıb. Onlardan 1 366 nəfər sağalıb, 2 911 nəfər ölüb, daha 619 xəstə isə təcrid olunub və ya xəstəxanaya yerləşdirilib.

Epidemiyanın qarşısının alınmasına mane olan amillər

Epidemiyaya qarşı mübarizə bir sıra ciddi çətinliklərlə üzləşir. Yoluxma hallarının böyük hissəsi KDR-in şərq əyalətlərində cəmlənib. Əhalinin sıx məskunlaşdığı bu ərazilərdə silahlı münaqişələr, insanların məcburi köçkün vəziyyətinə düşməsi və əvvəldən mövcud olan humanitar problemlər vəziyyəti daha da mürəkkəbləşdirir.

“Sərhədsiz Həkimlər” beynəlxalq tibbi-humanitar təşkilatının məlumatına görə, mövcud səhiyyə ehtiyacları ilə yanaşı, hava limanlarının bağlanması və uçuşlara tətbiq edilən məhdudiyyətlər də tibbi yardımın göstərilməsini çətinləşdirir. Bu vəziyyət tibb işçilərinin bölgələrə çatdırılmasına, diaqnostika prosesinə, xəstələrin digər tibb müəssisələrinə yönləndirilməsinə və tibbi ləvazimatların təchizat zəncirinə mane olur.

Epidemiyanın ön cəbhəsində çalışan tibb işçiləri də avqustun əvvəlində maaşlarının ödənilməməsinə və ağır iş şəraitinə etiraz olaraq tətilə çıxıblar.

Uqandada Ebola epidemiyası başa çatıb

Bu arada, Uqanda avqustun 28-də yeni yoluxma halı 42 gün ərzində qeydə alınmadıqdan sonra Ebola virusundan azad ölkə elan edilib.