Ümumdünya Səhiyyə Təşkilatı (ÜST) və tərəfdaşları preeklampsiya da daxil olmaqla, hamiləlik zamanı yaranan təzyiq pozuntularından qaynaqlanan ana və körpə ölümlərinin qarşısını almaq məqsədilə 2026–2035-ci illər üzrə yeni qlobal yol xəritəsini təqdim edib.

Aztibb.az "Medimagazin"ə istinadən yazır ki, strategiya klinik təlimatlardan, diaqnostika vasitələri və dərmanlara əlçatanlığın artırılmasınadək müxtəlif istiqamətlərdə birgə addımların atılmasını nəzərdə tutur.

Statistikaya əsasən, hipertenziv pozuntular dünyada hamiləliklərin 10-15 faizində müşahid olunur. Bu hallar hər il təxminən 42 min ananın, eləcə də 500 mindən çox yeni doğulmuş körpənin ölümünə səbəb olur. ÜST bildirir ki, xüsusilə az və orta gəlirli ölkələrdə arterial təzyiqin ölçülməsi, sidikdə zülal analizi, eləcə də maqnezium-sulfat, aspirin və antihipertensiv preparatlara çıxış imkanları hələ də məhduddur.

Bundan əlavə, yol xəritəsində preeklampsiyanın qarşısını almaq və ya müalicə etmək üçün xüsusi olaraq hazırlanmış təsdiqlənmiş dərmanların olmaması vurğulanır. Bu problemi həll etmək üçün təşkilat tədqiqat və innovasiyalara investisiyaların artırılmasına çağırış edib. Mütəxəssislər xəbərdarlıq edirlər ki, hamiləlikdə arterial təzyiq pozuntuları təkcə doğuş anında deyil, gələcək illərdə də qadınlarda və körpələrdə ürək-damar xəstəlikləri riskini yüksəldir.