Yeni tənəffüs yolu patogeninin meydana çıxması dünyada COVID-19 pandemiyasına bənzər genişmiqyaslı nəticələrə səbəb ola bilər.
Aztibb.az "Euronews"a istinadən yazır ki, Ümumdünya Səhiyyə Təşkilatının (ÜST) baş direktoru Tedros Adhanom Qebreyesus Nyu-Yorkda BMT Baş Assambleyasının iclası çərçivəsində keçirilən mətbuat konfransında mümkün yeni pandemiya risklərinə diqqət çəkib.
Onun sözlərinə görə, yeni tənəffüs patogeninin ortaya çıxması ciddi qlobal fəsadlarla nəticələnə bilər. Qebreyesus belə bir təhlükənin onu narahat edən əsas məsələlərdən biri olduğunu bildirib.
ÜST rəhbəri növbəti pandemiyanın baş verməsinin qaçılmaz olduğunu deyərək bunun yalnız nə vaxt baş verəcəyinin sual doğurduğunu vurğulayıb.
T. Qebreyesus Konqo Demokratik Respublikasında Ebolanın davam edən yayılmasını da nümunə göstərib. O qeyd edib ki, epidemiyalar istənilən yerdə və istənilən vaxt başlaya bilər və onların təsiri yalnız xəstəliyin yayıldığı ərazi ilə məhdudlaşmaya, qonşu ölkələr və bütövlükdə dünya üçün risk yarada bilər.
