"Nature" jurnalında dərc olunan yeni araşdırma göstərib ki, COVID-19 infeksiyası bəzi insanlarda orqanizmdə uzun müddət gizli qalan virusların yenidən aktivləşməsinə səbəb ola bilər.

Aztibb.az sözügedən araşdırmaya istinadən yazır ki, tədqiqatda COVID-19 səbəbilə xəstəxanaya yerləşdirilmiş 1154 pasiyentin məlumatları təhlil edilib.

Alimlər müəyyən ediblər ki, iştirakçıların təxminən yarısında əvvəllər orqanizmdə gizli qalan viruslar yenidən aktivləşib. Ən çox rast gəlinənlər Epşteyn-Barr virusu (EBV) və sitomeqalovirus (CMV) olub. Bu virusların aktivləşməsi COVID-19-un daha ağır keçməsi ilə əlaqələndirilib.

Araşdırmada həmçinin bəzi virusların, xüsusilə anellovirusların yenidən aktivləşməsi ilə uzunmüddətli COVID üçün xarakterik olan yorğunluq və digər fiziki şikayətlər arasında əlaqə aşkar edilib. Bununla belə, alimlər bunun səbəb-nəticə əlaqəsini hələ sübut etmədiyini vurğulayırlar.

Tədqiqat müəlliflərinin fikrincə, bu viruslar immun sisteminin fəaliyyətini poza bilər. Lakin onların uzunmüddətli COVID-in yaranmasında birbaşa rol oynayıb-oynamadığını müəyyən etmək üçün əlavə klinik araşdırmalara ehtiyac var.

Hazırda alimlər bəzi antivirus dərmanlarının bu gizli virusların yenidən aktivləşməsinin qarşısını alaraq uzunmüddətli COVID simptomlarını azalda bilib-bilməyəcəyini araşdırırlar.