Şənbə və bazar günləri ictimai nəqliyyatın işləməyəcəyini nəzərə alaraq, evdə oturmaq məsləhətdir - Terapevt çağırış etdi - aztibb.az AZƏRBAYCANIN SƏHİYYƏ XƏBƏR PORTALI

Şənbə və bazar günləri ictimai nəqliyyatın işləməyəcəyini nəzərə alaraq, evdə oturmaq məsləhətdir - Terapevt çağırış etdi

22.11.2020 10:19

“Bütün insanları COVID-19 virusu ilə mübarizədə mövcud karantin tələblərinə ciddi riayət etməyə, zərurət olmadıqda evdən çıxmamağa, qapalı və açıq məkanlarda sosial məsafəyə əməl etməyə çağırıram”.

Hazırda Azərbaycanda da bütün dünyada olduğu kimi COVID-19 infeksiyası yenidən kəskin yayılmağa başlayıb. Ölkəmizdə koronavirusa yoluxanların sayı 3 mini keçib. Virusun geniş yayılmasının qarşısının alınması üzrə müvafiq tədbirlər həyata keçirilir, karantin rejiminin qaydaları sərtləşdirilir.

Azərbaycan Respublikası Nazirlər Kabineti yanında Operativ Qərargahın son məlumatında Azərbaycanda virusun yayılmasının və onun törədə biləcəyi fəsadların qarşısının alınması məqsədi ilə ölkə ərazisində xüsusi karantin rejiminin müddəti 2020-ci il 28 dekabr saat 06:00-dək uzadılması bildirilir. Bu qaydalar hansılardır və virusa yoluxmaqdan özümüzü necə qoruyaq?

Mərkəzi Gömrük Hospitalının terapevti Dr.Nazilə Xəlilbəyova bu barədə danışaraq bildirib ki, məlum qaydalara əməl etməklə COVID-19 virusuna yoluxmanın qarşısını maksimum dərəcədə azaltmaq mümkündür. Azərbaycan Respublikası Nazirlər Kabineti yanında Operativ Qərargahın karantin rejiminin yeni qaydalarına görə, 2020-ci il 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.

Maskalardan istifadə qaydalarına nəzarət rejimi daha da sərtləşdirilir. İnsanlar özlərinin və ətrafdakıların sağlamlığına səhlənkarcasına yanaşır, çox təhlükəli virusdan qorunmaq üçün məlum qaydalara ciddi əməl etmirlər. Ona görə də, müvafiq yerlərdə: açıq havada, qapalı yerlərdə tibbi maskadan istifadə olunmaması və ya düzgün taxılmamasna görə cərimələr tətbiq olunacaq. Həftə sonları - şənbə və bazar günləri ictimai nəqliyyatın işləməyəcəyini nəzərə alaraq, evdə oturmaq məsləhətdir.

Yüksək risk qrupuna daxil olan 65 yaşdan yuxarı şəxslər koronavirusa yoluxduqda, xəstəliyi ağır keçirir, müxtəlif ağırlaşmalar olur. Buna görə də, yaşlı insanlara zərurət yaranmadan yaşayış yerlərini tərk etməmələri tövsiyə olunur. Yeni qaydalara əsasən özəl sektorda və digər sahələrdə fəaliyyət göstərən qurum və təşkilatlara da işçilərin say həddinin 30 faizədək azaldılması və digər əməkdaşların məsafədən iş rejiminə keçirilməsi tövsiyə edilir.

Bütün bu qaydalar bu gündən etibarən qüvvəyə minir. Bir daha bütün insanları COVID-19 virusu ilə mübarizədə mövcud karantin tələblərinə ciddi riayət etməyə, zərurət yoxdursa, evdən çıxmamağa, qapalı və açıq məkanlarda sosial məsafəyə əməl etməyə çağırıram.