ABŞ-ın Qida və Dərman Administrasiyası (FDA) aşağı sıxlıqlı lipoprotein xolesterinin (LDL-xolesterin) səviyyəsini azaltmaq üçün ilk qeyri-statin, ağızdan qəbul olunan PCSK9 inhibitorunu təsdiqləyib. Preparatın heteroziqot ailəvi hiperxolesterolemiyası (HeFH) olan xəstələrdə istifadəsinə də icazə verilib.

Aztibb.az "Dr Data"ya istinadən yazır ki, bu günədək PCSK9 inhibitorları əsasən 6 ayda bir dəfə tətbiq olunan inyeksiya formasında istifadə edilirdi. Lipid pozğunluqlarının müalicəsində statinlərdən başqa bempedoik turşu və ezetimib kimi preparatlar da mövcuddur. III faza klinik tədqiqatlarında yeni preparat həmin dərmanlarla və onların kombinasiyası ilə müqayisə olunaraq qiymətləndirilib.

Enlicitide (Lipfydra, Merck) adlı preparat 20 mq dozada təqdim edilir. Dərmanın qəbulu zamanı 6–8 saatlıq aclıq tələb olunur və tablet qəbul edildikdən sonra 30 dəqiqə ərzində qida qəbul edilməməsi tövsiyə olunur.

24 həftə davam edən digər klinik tədqiqatda aterosklerotik ürək-damar xəstəliyi və ya heteroziqot ailəvi hiperxolesterolemiyası olan 3 207 pasiyent iştirak edib. Araşdırmanın nəticələrinə görə, preparat LDL-xolesterinin səviyyəsinin azaldılmasında 56–59% effektivlik nümayiş etdirib.

Yeni preparatın digər üstün cəhətlərindən biri onun böyrək çatışmazlığının bütün mərhələlərində istifadə oluna bilməsidir. Bu xüsusiyyət, xüsusilə böyrəklər vasitəsilə xaric olunan bəzi statinlərlə (əsasən rozuvastatin) müqayisədə mühüm üstünlük hesab olunur.

Uzun illərdir ki, hiperxolesterolemiyanın müalicəsində əsas seçim statinlər, xüsusilə rozuvastatin və daha az hallarda atorvastatin olub. Lakin son onillikdə yeni lipidazaldıcı preparat qruplarının meydana çıxması göstərir ki, xolesterinin müalicəsində yalnız statinlərə əsaslanan dövr tədricən dəyişməkdədir.