Yay aylarında havanın temperaturunun yüksəlməsi ilə günvurma və susuzlaşma riski artır. Xüsusilə günəş şüalarının intensiv olduğu saatlarda açıq havada uzun müddət qalmaq sağlamlıq üçün təhlükəli ola bilər.

 

Bu barədə Aztibb.az-a məlumat verən Qəbələ Rayon Mərkəzi Xəstəxanasının həkim-terapevti Sədaqət Əsgərovanın sözlərinə görə, günəşdən düzgün qorunmaq günvurma riskinin qarşısını almaqda mühüm rol oynayır.

 

Sədaqət Əsgərova qeyd edib ki, günəş şüalarının daha intensiv olduğu 11:00–16:00 saatlarında açıq havada uzun müddət qalmamaq, kölgəli yerlərə üstünlük vermək, açıq rəngli və yüngül geyimlər seçmək, papaq və gün eynəyindən istifadə etmək tövsiyə olunur. Həmçinin gün ərzində kifayət qədər su qəbul etmək orqanizmin susuzlaşmasının qarşısını almağa kömək edir. Başgicəllənmə, ürəkbulanma, güclü baş ağrısı, halsızlıq və yüksək hərarət günvurmanın əlamətləri ola bilər.

 

Həkim bildirib ki, bu əlamətlər müşahidə olunduqda dərhal sərin yerə keçmək, maye qəbul etmək və vəziyyət yaxşılaşmadıqda həkimə müraciət etmək vacibdir.