Qusar RMX-dan Aztibb.az-a verilən xəbərə görə, konfransdan əvvəl iştirakçılar Ümummilli Lider Heydər Əliyevin Qusar şəhərində ucaldılmış abidəsini ziyarət edərək önünə gül dəstələri düzüb, Ulu Öndərin əziz xatirəsini dərin ehtiramla yad ediblər. Daha sonra Qusar Rayon Heydər Əliyev Mərkəzində keçirilən konfrans Ümummilli Lider Heydər Əliyevin və Vətən uğrunda canlarını fəda etmiş şəhidlərimizin əziz xatirəsinin bir dəqiqəlik sükutla yad edilməsi, ardınca isə Azərbaycan Respublikasının Dövlət Himninin səsləndirilməsi ilə öz işinə başlayıb.

 

Konfransda Qusar Rayon İcra Hakimiyyəti başçısının müavini, Ərazi-təşkilat və ictimai-siyasi məsələlər şöbəsinin müdiri Ceyhun Hacıyev, Azərbaycan Minimal İnvaziv Cərrahlar Cəmiyyətinin sədri, professor Qurbanxan Müslümov, Qusar Rayon Mərkəzi Xəstəxanasının direktoru İmran Qurbanov, “OKİ Hospital”ın baş həkimi İlham Kərimov, Azərbaycan Tibb Universitetinin professor-müəllim heyəti, eləcə də respublikanın müxtəlif bölgələrindən olan həkim-mütəxəssislər iştirak ediblər.

 

Çıxış edənlər konfransın elmi-praktik əhəmiyyətindən bəhs edərək, belə tədbirlərin regionlarda keçirilməsinin tibbi bilik və təcrübə mübadiləsinin genişlənməsinə mühüm töhfə verdiyini bildiriblər. Qusar Rayon İcra Hakimiyyəti başçısının müavini Ceyhun Hacıyev elmi-praktik əhəmiyyət daşıyan konfransın Qusarda keçirilməsini rayon üçün əlamətdar hadisə kimi qiymətləndirib. Azərbaycan Minimal İnvaziv Cərrahlar Cəmiyyətinin sədri, professor Qurbanxan Müslümov isə minimal invaziv cərrahiyyənin müasir tibbin prioritet istiqamətlərindən biri olduğunu vurğulayıb. Qusar Rayon Mərkəzi Xəstəxanasının direktoru İmran Qurbanov Regional Konfransın artıq üçüncü dəfə Qusar rayonunda keçirilməsindən məmnunluğunu ifadə edib.

 

İki gün davam edən konfrans çərçivəsində minimal invaziv cərrahiyyənin aktual mövzularına həsr olunmuş elmi məruzələr təqdim edilib, müasir diaqnostika və cərrahi müalicə üsulları müzakirə olunub, iştirakçılar arasında geniş fikir mübadiləsi aparılıb.

 

Konfransın əsas nəticələrindən biri kimi kəskin pankreatitin cərrahi müalicəsinə dair klinik protokol beynəlxalq təcrübə və müasir tibbi yanaşmalar əsasında yenilənərək tarixə "Qusar protokolu" adı ilə daxil olub. Bu sənəd minimal invaziv cərrahiyyə sahəsində elmi əməkdaşlığın gücləndirilməsi, klinik protokolların təkmilləşdirilməsi və regionlarda tibbi xidmətin keyfiyyətinin artırılması istiqamətində mühüm addım kimi qiymətləndirilib