Ali Səhiyyə Menecmenti Akademiyasının III sessiyasına qeydiyyat başlayıb

15.07.2026 12:38

Azərbaycan Təlim və İnkişaf Mərkəzi (ATİM) və From Science To Health qrupunun birgə təşkilatçılığı ilə həyata keçirilən Ali Səhiyyə Menecmenti Akademiyasının III sessiyası üzrə qeydiyyat elan olunub.

Bu barədə Aztibb.az-a ATİM-dən məlumat verilib.

Səhiyyə sahəsində çalışan rəhbər şəxslər və mütəxəssislər üçün nəzərdə tutulan proqramın əvvəlki iki sessiyası uğurla başa çatıb. Təşkilatçıların məlumatına görə, proqram iştirakçılar tərəfindən böyük maraqla qarşılanıb və əldə olunan biliklər səhiyyə müəssisələrində idarəetmə proseslərinin təkmilləşdirilməsində praktik tətbiqini tapıb.

Ali Səhiyyə Menecmenti Akademiyası dövlət və özəl tibb müəssisələrində çalışan rəhbərlər, həkimlər, klinik menecerlər, orta tibb işçiləri, inzibati heyət və digər səhiyyə əməkdaşları üçün hazırlanmış peşəkar inkişaf proqramıdır. Akademiyanın əsas məqsədi iştirakçıların idarəetmə bacarıqlarını gücləndirmək, səhiyyə müəssisələrində səmərəliliyi artırmaq və müasir idarəetmə yanaşmalarını tətbiq etməkdir.

III sessiyanın modulları

Bu sessiyada proqram dörd əsas modul üzrə keçiriləcək:

* Modul 1 – Keyfiyyət Liderliyi
(Keyfiyyətin idarə olunması, akkreditasiya və pasiyent təhlükəsizliyi)
* Modul 2 – Ağıllı Təchizat, Səmərəli Maliyyə
(Satınalma, təchizat zəncirinin idarə olunması, maliyyə və resursların səmərəli idarə edilməsi)
* Modul 3 – Xidmət Strategiyası
(Marketinq, satış, pasiyent cəlbi və tibbi müəssisələrin brendinqi)
* Modul 4 – Rəqəmsal Səhiyyə
(Süni intellekt (AI), data analitikası və rəqəmsal transformasiya)

Təşkilatçılar bildirirlər ki, proqram nəzəri biliklərlə yanaşı, real klinik və idarəetmə situasiyalarının təhlili, yerli və beynəlxalq ekspertlərlə təcrübə mübadiləsi və praktik məşğələlər vasitəsilə iştirakçıların peşəkar inkişafını dəstəkləyir.

Əvvəlki sessiyaların məzunları idarəetmə proseslərinin optimallaşdırılması, komanda motivasiyasının artırılması, performansın qiymətləndirilməsi və strateji planlaşdırma istiqamətlərində əldə etdikləri bilikləri artıq öz fəaliyyətlərində tətbiq etdiklərini bildiriblər.

Proqram xəstəxana və klinika direktorları, baş həkimlər və onların müavinləri, həkimlər, klinik menecerlər, tibb bacıları, orta tibb işçiləri, tibb müəssisələrinin inzibati və icraçı heyəti, eləcə də səhiyyə sahəsində peşəkar inkişafını gücləndirmək istəyən digər mütəxəssislər üçün nəzərdə tutulub.

Ali Səhiyyə Menecmenti Akademiyasının III sessiyası üzrə qeydiyyat artıq başlayıb. Səhiyyə idarəçiliyi sahəsində bilik və bacarıqlarını inkişaf etdirmək, peşəkar şəbəkəsini genişləndirmək və müasir idarəetmə yanaşmalarını mənimsəmək istəyən mütəxəssislər proqrama müraciət edə bilərlər.