Bir çox insan cümə gününü azadlığın rəmzi kimi gözləyir. Lakin iş həftəsinin sonunda rahatlıq hissi əvəzinə, özünü tam tükənmiş, əsəbi və ya gücsüz hiss edənlərin sayı az deyil. Bu, orqanizmin uzunmüddətli gərginliyə verdiyi normal reaksiyadır.

Aztibb.az "Life" portalına istinadən yazır ki, bu barədə həkim-psixoterapevt İrina Kraşkina  açıqlamasında bildirib.

Mütəxəssisin sözlərinə görə, həftə ərzində beyin fasiləsiz olaraq problemlərin həlli, son tarixlərə nəzarət və böyük həcmdə informasiyanın emalı ilə məşğul olur. Nəticədə idrak resursları tədricən tükənir, stress hormonlarının səviyyəsi yüksəlir və həftənin sonuna doğru yorğunluq o qədər güclənir ki, insan işin bitməsinə sevinmək əvəzinə, sadəcə özündə enerji çatışmazlığı hiss edir.

İrina Kraşkina qeyd edib ki, davamlı narahatlıq, emosional uzaqlaşma, işə qarşı laqeyd və ya kinayəli münasibət, həmçinin göstərilən bütün səylərin mənasız olduğu hissi də ciddi xəbərdaredici əlamətlərdir. Əgər əvvəllər zövq verən fəaliyyətlər artıq sevinc gətirmirsə və həftəsonu belə bərpa olunmaq mümkün olmursa, insan öz psixoloji vəziyyətinə daha diqqətlə yanaşmalıdır.

Həkimin fikrincə, keyfiyyətli istirahət yalnız heç nə etməməkdən ibarət deyil. Əsas məsələ fəaliyyət növünü dəyişməkdir. Araşdırmalar göstərir ki, təbiətdə gəzinti, orta intensivlikli fiziki aktivlik, yaradıcılıqla məşğul olmaq, yaxın insanlarla ünsiyyət və hər hansı məcburiyyət hissi yaratmadan zövq verən fəaliyyətlər psixoloji bərpaya daha çox kömək edir.

Mütəxəssis vurğulayıb ki, parkda cəmi 30–60 dəqiqəlik piyada gəzinti belə narahatlıq səviyyəsini azalda, əhval-ruhiyyəni yaxşılaşdıra və emosional tükənmənin qarşısının alınmasına töhfə verə bilər.