Mədə-bağırsaq traktının xroniki iltihabi xəstəlikləri sırasında yer alan Kron və Xoralı Kolit tez-tez bir-biri ilə səhv salınır.

Aztibb.az "Dr. Data"ya istinadən yazır ki, oxşar simptomlarla üzə çıxmalarına baxmayaraq, bu iki patologiya anatomik zədələnmə zonası, iltihabın dərinliyi və gedişat xüsusiyyətlərinə görə bir-birindən kəskin şəkildə fərqlənir.

Mütəxəssislərin bildirdiyinə görə, bu xəstəliklər arasında əsas fərqli məqamlar aşağıdakılardır:

Kron xəstəliyi virslərin və iltihabın təsiri ilə ağız boşluğundan anusa qədər həzm sisteminin istənilən hissəsində meydana gələ bildiyi halda, Xoralı Kolit yalnız yoğun bağırsaq və düz bağırsaqda (rektum) inkişaf edir.

Kron zamanı sağlam və xəstə toxumalar növbələşir, yəni yamaqvari (sıçrayıcı) zədələnmə müşahidə olunur. Xoralı Kolitdə isə iltihab düz bağırsaqdan başlayaraq yuxarıya doğru kəsintisiz və bütöv şəkildə yayılır.

Kron xəstəliyi bağırsaq divarının bütün təbəqələrinə dərinləməsinə nüfuz edir. Xoralı Kolit isə əsasən bağırsağın daxili səthi selikli qişasını (mukozasını) zədələyir.

Xoralı Kolit üçün qanlı və bəlğəmli ishal daha xarakterik hesab olunur. Kron xəstəliyində isə bağırsaq darlığı (strikturalar), abseslər və fistulaların (dəliklərin) yaranma riski daha yüksəkdir.

Həkimlər vurğulayır ki, hər iki xəstəliyin vaxtında və dəqiq təyini müalicənin uğuru üçün kritik əhəmiyyət kəsb edir. Qarın nahiyəsində uzunmüddətli ağrılar, həzm pozuntuları və çəki itkisi kimi hallarda dərhal mütəxəssis-qastroenteroloqa müraciət edilməlidir.